SPD4459打工仔返工一星期，去到周末總會想慢慢食個飯、飲杯茶，再嘆個甜品！今日小編就同大家推介位於銅鑼灣及尖沙咀既台式食肆「咖啡弄」！顧名思義，這間鋪頭專賣紅茶、咖啡類飲品，雖然款色眾多，但小編就想帶大家試一試佢地既食物！
打開MENU，其實佢地既食物種類不算多，以三文治跟一些小食為主，主菜欠奉！今次小編就order了BBQ三文治、鹽酥雞、限定的喇沙冬粉作為晚餐，另點了咖啡及玫瑰奶茶！
BBQ三文治就是很豐富的三文治，軟麵包內夾有大大片火腿及蕃茄，配上薯蓉，好食，算是唔錯的配搭！
作為小食既鹽酥雞唔會好似台灣正宗咁鹹，加上檸檬汁，唔會太油膩，粉漿不太厚，內有啖啖雞肉，唔錯！
每年annual dinner都要幫手諗諗去邊到食，小編既SPD4459同事唔多啱中菜，又唔想成日食buffet，而且每位budget又唔係多，所以今年就選了位於銅鑼灣的西式餐廳 Penthouse，呢家餐廳係2014年開業，係openrice既評語唔錯，新嘗試剛好作為新一年的開始。
25樓高空，有落地玻璃，可惜隔離有另一間高樓大廈，靚景欠奉！話哂貴價餐廳，當然唔少得生蠔作為頭盤啦～每人兩款唔同味，$60/隻，雖然海水味令生蠔鹹左少少，但都算新鮮肥美！
之後就開始自家制麵包作飯前小食，麵包雖香，但堅硬無比，有如香港傳統硬豬包，喜歡有𡁻頭既朋友應該會LIKE！
開胃菜當然有凱撒沙律、PIZZA等等幾樣，味道中規中矩，但份量尤其少，令一眾同事擔心之後會否需要再另食車仔麵！
還好，皇天不負有心人，到來的slow-cook Lambs同Ribs既份量都唔少，鬆了一口氣！兩款肉既火候掌握唔錯，肉唔太靱或乾，肉汁加上醬汁，幾好味！小編最愛係作為配料既燒黑蒜，味道超香！
最大既Paella份量非常多，雖然佢話係4人用，但8個人食都完全無問題。材料非常多，大蝦、青口、魷魚、蜆等等，飯煮得較乾身，唔似Risotto咁淋，Ok好味！
最後當然有甜品，係分子雪糕，但無咩太大特別！
坦白講，價錢一啲都唔平，每位平均大概$600左右。但人一世物一世，試下無妨！
Penthouse
Menu: http://www.penthouse-dining.com/upload/file/img-1497839671.pdf
地址：銅鑼灣登龍街1至29號金朝陽中心二期30樓
T：2970 0828
W：http://www.penthouse-dining.com/
Facebook : https://www.facebook.com/penthouse.dining/
前陣子，SPD4459成日都見到有人係 FB、IG曬「星加坡鹹蛋魚皮」有幾好食，所以小編決定一嚐究竟！經歷千辛萬苦、左托右托，花費110個大洋，終於成功到手！
打開包裝，已經被飄來的陣陣鹹蛋黃的鹹香味深深吸引，小編急不及待伸出魔爪，拿出一塊魚皮…
大大塊魚皮，外包一層金黃色鹹蛋黃粉，令人垂涎欲滴，一啖咬下去，魚皮鬆脆香口，比打邊爐食的較為脆身，而外層的鹹蛋黃粉入口即溶，鹹香既味道為脆皮魚皮增添畫龍點睛的效果… 喜歡食鹹蛋黃既朋友必定愛上。
值得留意係由於魚皮本身唔可以存放太耐，空氣中既水份會讓魚皮變淋，建議買到後盡快食完。
SPD4459 打工仔難得放假，春光明媚，梗係出街曬曬太陽，嘆個靚靚下午茶啦！
今日下午，行經銅鑼灣鵝頸橋附近，看見一間理應不存在港島區的「紅磡冰室」。
門口大大個由燈泡組成的招牌，內裹的裝修都不錯，整個格局由木製傢俬及工業風砌成，非常有現代風格。一入門口就見到人山人海，內有不少由四海八面來的食客，證明食物有保證！
來得嘆下午茶，當然不會只吃粥粉麵飯這類普通嘢，今次就點了港人至愛「西多士」及「菠蘿油」，另配冰室必飲「紅豆冰」！
西多士非常有驚喜，金黃色的蛋漿包裹着軟綿綿的方包，上面溶化中的牛油加上甜絲絲的煉奶…一刀切下去，就看見淡黃色的流心餡慢慢流出來，原來是奶黃醬！咬下去甜味適中，非常好食，亦不油膩！值得比個LIKE！
復活節，是耶穌復活的日子，亦是SPD4459一眾打工仔嘅復活日。
慢長的工作就是為了一刻鐘的享受！
今日，小編就介紹一間好適合一家大小、朋友聚餐的人氣日式火鍋放題店「牛涮鍋」Mou Mou Club。「牛涮鍋」源自日本東京，主打和牛及澳美進口牛肉，並且提供日本涮涮鍋（しゃぶしゃぶ）及壽喜燒（すき焼き）的烹調方法，讓客人自選食物。
這次小編與朋友去的就是位於旺角新世紀廣場，晚上6:45開始等，到了7:45終於入坐。
成間舖頭以旅行作主題，一入門口，就見到好可愛嘅代言牛牛mou mou君同埋佢嘅朋友。
每張枱與枱中間都有像行李箱概間板，整間舖頭嘅裝修顏色豐富，整體格局好有小朋友樂園的感覺，令食客覺得好開心！
之於套餐方面，根㯫肉類多少有不同定價，同時亦顧及素食人士提供蔬菜套餐。
今次小編就點了US特上牛放題，$198／位，套餐包括美國進口牛，亦有豬肉及月大土肉。
湯底方面就有昆布、泡菜、鰹魚、蕃茄、豬骨、甜醬六款選擇，甜醬就是為了仿照壽喜燒。值得一讚的是就算小編只有2個人，都可以變得鴛鴦鍋，所以就點了鰹魚跟豬骨兩款。
由於火鍋時間只有90分鐘，所以係等湯底到來期間，梗係出去攞住其他嘢食先啦！佢地蔬果、腸仔、麵食、甜品種類超多元化，仲有一些特別食物，好似南瓜年糕、炸魚蛋、雪耳等。就算丸都有近十款，反觀蔬菜不算太多。飲品就有汽水跟果汁，仲有果汁蘇打教學，比起其他舖頭的款類有過之而無不及，難怪門口永遠大排長龍！
湯底終於上場啦！不要怪小編拍照技術差，太多泡泡同蒸氣…湯底食落不錯，個人覺得鰹魚湯底偏咸但清爽，而豬骨湯底穩打穩紥，無得輸！
肉類外觀都非當新鮮，肥瘦適中，食完一碟再一碟，正！
最後當然去雪糕櫃攞雪糕食，紫薯、牛奶味任君選擇，佢地仲有不同配類跟杯裝同筒裝比你自己DIY！
總括而言，「牛涮鍋」相比其他如牛陣等火鍋店，多了一種歡樂，食物總類亦比較多同貼心！
電話：3184 0384
地址：旺角新世紀廣場4樓423號鋪
網址：http://moumouclub.com/
Facebook：https://www.facebook.com/MouMouClub/
SPD4459打工仔成日同朋友出街都係食日本菜、韓國菜… 悶到呢～有時都想食啲其他嘢！
呢兩個月不約而同去左兩間位於銅鑼灣及灣仔既素食中菜館，「功德林」及「貴德宮」。
相信唔少人都聽過「功德林」呢個名，作為一間老字號嘅上海品牌，佢都可算是素食鼻祖！先講環境，一般的酒樓格局，但如果你有4位親友以上，可以選擇窗邊位置，從世貿中心25樓遠眺，精神為之一振！
打開餐牌，就知道佢地主打「好味」，所有餸菜偏平實，羅漢齋、麻婆豆腐、上海粗炒等等… 今次我地兩個人叫左三味菜：雞絲粉皮、津白炒年糕、脆皮素鵝。
首先係雞絲粉皮，佢地用嘅粉皮比其他舖頭幼細及晶瑩剔透，而醬料方面除左一般芝麻醬，亦有混合花生醬，咸甜適中，值得一讚！而素鵝則沒有甚麼特別，金黃色嘅外皮包裹住冬菇粒、菜脯粒、蘿蔔粒等等，味道不俗！上海年糕就汁多糕薄，每塊年糕厚度均勻，不會太油膩。一餐下來，感覺不錯，素菜實而不華，帶有傳統的美味！
至於「貴德宮」就主打創意素食，老板馮太係一位素食專家，成日上報紙講有關素食新配搭。講得上私房菜，菜單當然由老板決定！今次品嚐的名副其實「素宴」，一餐連甜品10味菜，包括︰海珊瑚千色拼盤、京醬玉瓜酥伴角包、芝士焗日本米餅、咖喱配法包、香煎年藕餅…等等！
係上菜之前，先飲啖薰衣草茶先，聞起上來幾香，用來放鬆心情準備享用晚餐…
作為前菜的海珊瑚千色拼盤，可算係眾多味餸菜中最有特色的素食，由皮蛋、粉皮、壽司組成，當中滷水豬肉仿真度極高，味道清爽開胃，唔錯！
京醬玉瓜酥伴角包就仿照北京填鴨，大大個包夾啲素肉。
反觀米餅就有少少hea，味道酸酸甜甜，日本米餅搭一片蕃茄加上芝士然後焗，好似自己係屋企都可以整到，雖然特別但唔值囉！
咖喱就有香濃黃咖喱味，唔辣，個人覺得配飯好過配法包！
最後甜品為桂花糕同杏仁露，尚算OK！總觀所有食物，太多利用豆類製品，腐皮、枝竹作為主菜佔了兩三味，令到整個晚餐有點沉悶，埋單每人HKD260，有點華而不實！而且佢地上菜主要都會係食完一樣才上另一樣，除非你食得特別慢，否則都要等等！
總括而言，兩間都力推中高檔素食，耐何食物質素與價錢總有落差，尤其是貴德宮，服務質素雖然好，但這個價錢就唔太值！個人建議可以一嚐，但不用多嚐！
功德林上海素食
電話：28819966
地址：銅鑼灣世貿中心10樓
參考網頁：Openrice
貴德宮皇廷素宴
電話：28386506 ／ 82003066
地址：灣仔廣生行大樓B座閣樓
參考網頁：Openrice
SPD4459打工仔，每日放工獨自一人，就會拖着疲累的身軀，一邊走，一邊諗下應該去邊間飯堂解決自己既晚餐，大家樂？麥記？茶餐廳？今日，就為大家介紹一間位於小西灣商場新開既食肆「101台式休間餐廳」…
通常一入舖頭，即刻就係要睇餐牌！大大個餐牌，簡簡單單幾個套餐，飯類及麵食，加上幾款飲品，一眼望哂。基本上所有主菜都係$45左右，以晚餐來說，尚算便宜！
揀好就可以點餐啦～ 呢間鋪頭點餐方法與大家樂、大快活無異，先去售賣處比錢點餐，店員就會比個號碼牌你，然後搵位坐，侍應就會照編號送餐。
唔洗五分鐘，食物就已經送到。今次就點左一個「麻辣鹽水雞翼麵」及「板雞麻辣麻醬拌麵」！坦白講，食物質素一般。本身小編喜歡比較彈牙嘅麵條，而這間舖頭嘅麵條較為淋同埋易散，口感麻麻！味道方便就普普通通，無咩驚喜，鹽水雞翼就好似水煮雞翼嘅質感，所謂嘅麻辣亦無咩特別。事實上我之前都食過幾次，其中蕃茄牛肉麵就比較好食！牛肉味濃…
同埋我見到唔少人叫三杯雞飯，應該都係唔錯之選！
睇相以為份量唔多，其實一啲都唔少！搬開啲餸比大家睇睇！
既然講到咁，點解仲要介紹呢間台式快餐店比大家？
都係嗰句啦，唔通日日放工都係食嗰幾間咩？以50元有找嘅價錢，你唔會期望會好好食，但只少唔好難食！呢間舖頭，就符合到呢個最簡單嘅要求！
101台式餐廳 (旺角、將軍澳等都有分店）
地址：港柴灣小西灣道10號小西灣廣場1樓119
Openrice：https://www.openrice.com/zh/hongkong/r-101%E5%8F%B0%E5%BC%8F%E4%BC%91%E9%96%92%E9%A4%90%E5%BB%B3-%E6%9F%B4%E7%81%A3-%E5%8F%B0%E7%81%A3%E8%8F%9C-r561814
每當有公司拍檔來探訪，我地呢班SPD4459打工仔就會有食神，可以品嘗各式各樣的小食、零食！今日，又有一盒係來自台灣的日式糕餅品牌 「御倉屋」的お土産（おみやげ）。
日本包裝講求精緻，「御倉屋」亦不惶多讓，首先係布質料包裝袋，靚靜鮮紅色配可愛猫猫公仔！攞出街無得輸！
包裝袋內當然嘅包裝盒極富日本色彩，粉紅色櫻花配以兩個好 fancy 嘅貓貓圖案，少女心當堂爆發！
打開盒蓋，內有兩層，餅乾種類及口味都非常多花款，例如普通嘅朱古力曲奇、藍莓醬曲奇、咖啡味曲奇等等，而無糖寒天黑豆曲奇及鹽燒魚卷兩種就最有趣！當中最好食係抹茶黑芝麻曲奇，抺茶夠香且濃，但不太苦，喜歡抺茶嘅朋友可以試試！
可能係主打可愛甜蜜，所以呢個品牌係台灣同 Hello Kitty Crossover 推出喜餅系列！非常可愛！如果走粉紅可愛風嘅朋友，可以考慮！
香港暫時只有 ISABELLE 有得訂購！
香港訂購網址：http://www.isabelle.com.hk/
官方網址：http://www.okuraya.com.tw/
台灣 Facebook : https://www.facebook.com/okuraya/
由於香港近年租金勁升，以至銅鑼灣區好多食肆都重新洗底，以前出名平民嘅越南餐廳，好似越式、名堤、喜越等鋪頭相繼結業搬遷，又多了一啲食肆好似芽莊、fûhn等，今日要介紹嘅係位於登龍街附近嘅「越男仔」！
餐廳本身價格不算太平民，晚餐最低消費都要大約＄100／位。打開MENU有唔少嘢食，例如火車頭、撈粉、扎肉飯、海鮮檬粉等等！小食花款都有好多，好似海膽檬紙卷。佢地主要提供套餐，主菜、小食加飲品，當然唔同組合就唔同價錢啦！
今次，我地叫左三寶撈檬同埋火車頭河粉，仲點左兩個小食，包括芝心蝦多士及春卷！蝦多士味道唔錯，蝦餅夠厚，芝士味都好出，十分合拍！
由於小編非常鍾愛撈檬，今次嘅三寶撈檬非常好味，材料夠多，手撕雞、豬勁肉同埋扎肉都有味道，唔油同埋啲肉唔柴，相配嘅魚露不會太咸！啱哂我呢啲喜歡清淡嘅SPD4459打工仔。另外火車頭河粉亦唔錯，大大塊生菜係隔離，牛肉滑流、牛栢葉唔靭、河粉唔散，好食！
最近佢地做緊promotion，只要係星期日至四LIKE佢地facebook，可以全單88%！
我地今餐夾埋大概$220，作為銅鑼灣嘅晚飯，呢個價錢都算正常！
總括而言，呢間越南餐廳味道尚算中上，可以再食！
越男仔
地址：銅鑼灣登龍街18號V-Point地下1號舖
T：28118238
Facebook：https://www.facebook.com/DeVietHouse2010/
星期六，係唔少SPD4459打工仔同朋友食個飯聚一聚的好日子！在各式各樣嘅食肆中，韓式燒肉店成為近年最多香港人食飯落腳點之一，當中又以新寶羅、喜來稀肉等等韓燒名店非常受歡迎！
今日推介係其中一間韓國過江龍名店「新麻蒲BBQ」，除左銅鑼灣外，佢係元朗、旺角都有分店！而小編同大家介紹係銅鑼灣店。
坦白講，一打開menu，佢有好多唔同嘅肉類，豬牛雞樣樣都有，但食品個價錢都幾貴，好套餐肉類基本都要三百以上，而且份量唔算多！但勝在伴菜較多，兩人合計大概有4-5款，酸蘿蔔、紫菜、洋葱、泡菜等等，而且有沙律送，加埋燒肉旁邊嘅煎蛋，叫少少都可以食得好飽！佢最近都多左啲特色肉類，好似護心肉、特級霜降牛肉等等…
今晚2個人食，我地只係叫左一個豬腩肉同埋一個炒粉絲，聽落好似好少，但有圖有真相，成枱都係餸！
佢既蛋有泡菜係裹面，雖然唔少韓燒店都有，但佢算係料較多。其實小編係其他舖頭見過最有趣嘅配料係粟米同埋芝士，唔可以話唔好食，不過係韓燒店梗係食泡菜啦！
由於小編非常偏愛韓式炒粉絲，食過唔少舖頭嘅粉絲，自己點整都整唔到佢種味，而呢間嘅粉絲係較幼身，而牛肉等配料都切得較細，所以入味得來唔太咸！同埋可以見到佢有落黑白芝麻，算係幾特別！
埋單2人大概350左右，如果只係叫肉，呢個價錢就絕對食唔飽！所以小編建議大家叫個年糕、部隊鍋或者粉絲打底，大概$100左右一碟，另點啲肉去燒，咁拉勻價錢就會無咁貴啦！
PS. 嗰日我地都遇見唔識講廣東話嘅韓國店員，証明開店嘅係純正韓國人！
PS.2. 其實係銅鑼灣新麻蒲呢個地點之前，係同樣一間叫「麻浦」嘅韓式燒肉店，做左幾年就由呢間新麻蒲接手，但我係google又搵唔到相關嘅新聞，唔知兩間鋪頭有無關係呢？
新麻蒲BBQ
地址：銅鑼灣波斯富街24-30號寶漢大廈2樓
電話：25616268
Facebook: https://www.facebook.com/shinmapobbq/
openrice: https://www.openrice.com/zh/hongkong/r-%E6%96%B0%E9%BA%BB%E8%92%B2-bbq-%E9%8A%85%E9%91%BC%E7%81%A3-%E9%9F%93%E5%9C%8B%E8%8F%9C-%E7%83%A4%E8%82%89-r176942/reviews?page=2
SPD4459 打工仔 Work for eat 